ᢈᠡᠨᠲᠡᠢ ᠠᠶᠢᠮᠠᠭ ᠤ᠋ᠨ ᠪᠣᠷᠤ-ᠥᠨᠳᠦᠷ ᠰᠤᠮᠤ ᠳᠠᢈᠢ ᠰᠤᠮᠤ ᠳᠤᠮᠳᠠ ᠶ᠋ᠢᠨ ᠫᠷᠤᠻᠦᠷᠤᠷ ᠤ᠋ᠨ ᠭᠠᠵᠠᠷ ᠠ᠋ᠴᠠ ᠳᠠᠷᠬᠠᠨ᠂ ᠪᠠᠶᠠᠨᠮᠥ᠋ᠩᢈᠡ᠂ ᠪᠣᠷᠤ-ᠥᠨᠳᠦᠷ᠂ ᠭᠠᠯᠰᠢᠷᠠ ᠰᠤᠮᠤᠳ ᠤ᠋ᠨ ᢈᠡᠮᠵᠢᠶᠡᠨ ᠳ᠋ᠦ ᠒᠐᠒᠔ ᠣᠨ ᠳ᠋ᠤ ᠦᠢᠯᠡᠳᠦᢉᠳᠡᢉᠰᠡᠨ ᠵᠥᠷᠢᠴᠡᠯ ᠦ᠋ᠨ ᢈᠡᠷᠡᢉ ᠦ᠋ᠨ ᠭᠠᠷᠤᠯᠲᠠ᠂ ᠰᠢᠯᠲᠠᠭᠠᠨ ᠨᠥᢈᠦᠴᠡᠯ ᠢ᠋ ᠰᠤᠳᠤᠯᠤᠭᠰᠠᠨ ᠪᠠᠶᠢᠨᠠ᠃
᠒᠐᠒᠔ ᠣᠨ ᠳ᠋ᠤ ᠳᠡᢉᠡᠷᠡᢈᠢ ᠰᠤᠮᠤᠳ ᠲᠤ ᠪᠦᠷᠢᠳᢈᠡᢉᠳᠡᢉᠰᠡᠨ ᠨᠡᠶᠢᠲᠡ ᠕᠗᠑ ᠵᠥᠷᠢᠴᠡᠯ ᠦ᠋ᠨ ᠔᠙᠂᠔ ᠬᠤᠪᠢ ᠨᠢ ᠵᠠᠮ ᠤ᠋ᠨ ᢈᠥᠳᠡᠯᢉᠡᢉᠡᠨ ᠦ᠋ ᠠᠶᠤᠯ ᠦᢉᠡᠢ ᠪᠠᠶᠢᠳᠠᠯ ᠤ᠋ᠨ ᠲᠤᠬᠠᠢ ᠬᠠᠤᠯᠢ ᠵᠥᠷᠢᠴᠡᢈᠦ ᠵᠥᠷᠢᠴᠡᠯ᠂ ᠑᠕᠂᠒ ᠬᠤᠪᠢ ᠨᠢ ᢈᠦᠮᠦᠨ ᠦ᠋ ᠪᠡᠶᠡ ᠳ᠋ᠦ ᠬᠠᠯᠳᠠᠬᠤ ᠵᠥᠷᠢᠴᠡᠯ᠂ ᠗᠂᠔ ᠬᠤᠪᠢ ᠨᠢ ᢉᠡᠷ ᠪᠦᠯᠢ ᠶ᠋ᠢᠨ ᢈᠦᠴᠦᠷᢈᠡᠶᠢᠯᠡᠯ ᠲᠡᠢ ᠲᠡᠮᠡᠴᠡᢈᠦ ᠲᠤᠬᠠᠢ ᠬᠠᠤᠯᠢ ᠵᠥᠷᠢᠴᠡᢈᠦ ᠵᠥᠷᠢᠴᠡᠯ ᠪᠠᠶᠢᠨᠠ᠃
ᠡᢉᠦᠨ ᠡᠴᠡ ᠵᠣᠩᢈᠢᠯᠠᠨ ᠦᠶᠢᠯᠡᠳᠦᢉᠳᠡᠳᠡᢉ ᠵᠠᠷᠢᠮ ᠲᠥᠷᠦᠯ ᠦ᠋ᠨ ᠵᠥᠷᠢᠴᠡᠯ ᠦ᠋ᠨ ᢈᠡᠷᠡᢉ ᠦ᠋ᠨ ᠭᠠᠷᠤᠯᠲᠠ ᠒᠐᠒᠓ ᠣᠨ ᠠ᠋ᠴᠠ ᠪᠠᠭᠤᠷᠠᠵᠡᠢ᠃ ᠲᠣᠳᠤᠷᠠᠭᠤᠯᠪᠠᠯ᠂ ᠵᠠᠮ ᠤ᠋ᠨ ᢈᠥᠳᠡᠯᢉᠡᢉᠡᠨ ᠦ᠋ ᠠᠶᠤᠯ ᠦᢉᠡᠢ ᠪᠠᠶᠢᠳᠠᠯ ᠤ᠋ᠨ ᠲᠤᠬᠠᠢ ᠬᠠᠤᠯᠢ ᠵᠥᠷᠢᠴᠡᢈᠦ ᠵᠥᠷᠢᠴᠡᠯ ᠗᠂᠕ ᠬᠤᠪᠢ ᠪᠠᠷ᠂ ᢉᠡᠷ ᠪᠦᠯᠢ ᠶ᠋ᠢᠨ ᢈᠦᠴᠦᠷᢈᠡᠶᠢᠯᠡᠯ ᠲᠡᠢ ᠲᠡᠮᠡᠴᠡᢈᠦ ᠲᠤᠬᠠᠢ ᠬᠠᠤᠯᠢ ᠵᠥᠷᠢᠴᠡᢈᠦ ᠵᠥᠷᠢᠴᠡᠯ ᠖᠂᠗ ᠬᠤᠪᠢ ᠪᠠᠷ ᠲᠤᠰ ᠲᠤᠰ ᠪᠠᠭᠤᠷᠠᠭᠰᠠᠨ ᠪᠠᠶᠢᠨᠠ᠃
ᠬᠠᠷᠢᠨ ᠲᠠᠩᠬᠠᠶᠢᠷᠠᠬᠤ ᠵᠥᠷᠢᠴᠡᠯ ᠓᠕᠂᠙ ᠬᠤᠪᠢ ᠪᠠᠷ᠂ ᢈᠦᠮᠦᠨ ᠦ᠋ ᠪᠡᠶᠡ ᠳ᠋ᠦ ᠬᠠᠯᠳᠠᠬᠤ ᠵᠥᠷᠢᠴᠡᠯ ᠑᠖ ᠬᠤᠪᠢ ᠪᠠᠷ᠂ ᢈᠡᠦᢈᠡᠳ ᠦ᠋ᠨ ᠡᠷᢈᠡ ᠶ᠋ᠢ ᠵᠥᠷᠢᠴᠡᢈᠦ ᠵᠥᠷᠢᠴᠡᠯ ᠑᠓ ᠬᠤᠪᠢ ᠪᠠᠷ᠂ ᠡᠳ᠋ ᢈᠥᠷᠦᠩᢉᠡ ᠤᠰᠠᠳᠬᠠᠬᠤ᠂ ᢉᠡᠮᠲᠦᢉᠡᢈᠦ ᠵᠥᠷᠢᠴᠡᠯ ᠑᠒᠂᠕ ᠬᠤᠪᠢ ᠪᠠᠷ ᠥᠰᠴᠡᠢ᠃
ᠰᠤᠳᠤᠯᠭᠠ ᠪᠠᠷ ᠒᠘ ᠲᠥᠷᠦ ᠶ᠋ᠢᠨ ᠠᠯᠪᠠᠨ ᠬᠠᠭᠠᠭᠴᠢ ᠵᠥᠷᠢᠴᠡᠯ ᠳ᠋ᠦ ᠬᠣᠯᠪᠤᠭᠳᠠᠵᠤ᠂ ᠖᠘᠂᠙ ᠬᠤᠪᠢ ᠨᠢ ᠵᠠᠮ ᠤ᠋ᠨ ᢈᠥᠳᠡᠯᢉᠡᢉᠡᠨ ᠦ᠋ ᠠᠶᠤᠯ ᠦᢉᠡᠢ ᠪᠠᠶᠢᠳᠠᠯ ᠤ᠋ᠨ ᠲᠤᠬᠠᠢ ᠬᠠᠤᠯᠢ ᠵᠥᠷᠢᠴᠡᢈᠦ ᠵᠥᠷᠢᠴᠡᠯ ᠦᠢᠯᠡᠳᠦᢉᠰᠡᠨ ᠪᠠᠶᠢᠨᠠ᠃
ᠰᠤᠳᠤᠯᠭᠠᠨ ᠤ᠋ ᠳ᠋ᠦᠩ ᠳ᠋ᠦ ᠦᠨᠳᠦᠰᠦᠯᠡᠨ ᠲᠤᠰ ᠫᠷᠣᠻᠦ᠋ᠷᠣᠷ ᠤ᠋ᠨ ᠭᠠᠵᠠᠷ ᠠ᠋ᠴᠠ ᢈᠡᠨᠲᠡᠢ ᠠᠶᠢᠮᠠᠭ ᠳ᠋ᠠᢈᠢ ᠲᠥᠷᠦ ᠶ᠋ᠢᠨ ᠠᠯᠪᠠᠨ ᠤ᠋ ᠰᠠᠯᠪᠤᠷᠢ ᠵᠥᠪᠯᠡᠯ᠂ ᠰᠤᠮᠤᠨ ᠨᠤᠭᠤᠳ ᠤ᠋ᠨ ᢉᠡᠮᠲᠦ ᢈᠡᠷᠡᢉ᠂ ᠵᠥᠷᠢᠴᠡᠯ ᠡᠴᠡ ᠤᠷᠢᠳᠴᠢᠯᠠᠨ ᠰᠡᠷᢉᠡᠶᠢᠯᠡᢈᠦ ᠠᠵᠢᠯ ᠢ᠋ ᠵᠣᢈᠢᠴᠠᠭᠤᠯᠬᠤ ᠰᠠᠯᠪᠤᠷᠢ ᠵᠥᠪᠯᠡᠯ ᠲᠡᠢ ᠬᠠᠮᠲᠤᠷᠠᠨ ᠲᠥᠷᠦ ᠶ᠋ᠢᠨ ᠠᠯᠪᠠᠨ ᠬᠠᠭᠠᠭᠴᠢᠳ ᠲᠤ ᠰᠤᠷᠭᠠᠯᠲᠠ ᠵᠣᢈᠢᠶᠠᠨ ᠪᠠᠶᠢᠭᠤᠯᠵᠤ᠂ ᠢᠷᢉᠡᠳ ᠲᠦ ᢉᠡᠮᠲᠦ ᢈᠡᠷᠡᢉ᠂ ᠵᠥᠷᠢᠴᠡᠯ ᠡᠴᠡ ᠤᠷᠢᠳᠴᠢᠯᠠᠨ ᠰᠡᠷᢉᠡᠶᠢᠯᠡᢈᠦ ᠴᠢᢉᠯᠡᠯ ᠢ᠋ᠶᠡᠷ ᠶᠠᠷᠢᠶᠠ ᠲᠠᠨᠢᠭᠤᠯᠭᠠ ᢈᠢᠵᠡᠢ᠃